الشمس ف الحرف
جرى قلمى على الصفحة
يفجر جمر
ف جزر ومد
قضايا العصر
عواصف لون بتتوزع
ف تشكيلها صور حية
ف دلتا ونيل ف صوت أراغيل
ف أنشودة بتتردد
مع الجماهير..
مع التصغير..
مع التكبير..
مع طموحى
ف روح وردة بتتفتح
ف بوح صخرة بتتفتت
وتجرفنى مع التيار
حروف قلمى..
بتاسرنى
تشكلنى
ف بدن الجسم من تانى
ويطرح ف الفضا سؤالى
ومالقاش رد
وبعد الرحلة مع قلقى
عبرت بكل أفكارى
جزيرة الخوف
رجعت لزهربستانى
ومملكتى..
ومن بؤرة أحساسيس
حاولت أن أزرع الكلمة
ديوان م الشعر
ويبقى الشعر عنوانى
ومدخل درب أحلامى
وتتحول عيون الشعر
عيون زهرة
جمال فكرة
أمل بكرة
وأبدر صوتى كلمة حق
وأمد الأيد
أمد الأيد أطول الشمس
وأدفى الحرف
وأتنفس..
قصايد شعر
ليست هناك تعليقات:
إرسال تعليق