صرخة السر المجنون
تخاريف وشوشة الريح
بتقولك تبقى صريح
حتى لو قالوا مجنون
إيه يعنى م التجريح
إيه يعنى لما يكون
الصوت منحاش ف الصدر
بيزوم من كتر اللوم
غرقان ومالوش ف العوم
والحزن النايم عاد
والدهشة بتملى عيون
مشنوق ع الحيط الفرح
عمرك حايشق يطق
قول حتى كلمة حق
دا الصبر على الرصفان
عايش طول عمره جعان
رافض يتقاله جبان
حتى ولو مات عطشان
ولا عمره لحظة يئن
إيه يعنى لما يكون
متفرعن دارى الهامه
ما بقاش للبدر علامة
مكسورة مرايه الشوف
وكتب بأديه الخوف
كشر يا زمان على قدك
ضاعت أحلامنا بيدك
ما بقاش الحب غزال
ما بقاش الشوق موال
والسر اهو ساب البير
ف مدينة من غير قلب
دى الشمس ما بتطلعش
والشجرة ما بتطرحش
وضميرنا ما بيصحاش
متدارى ف ضلع شيطان
وشوشة الريح بتقولك
أبقى ولو مره صريح
ما تخافش م التجريح
حتى لو قالوا مجنون
ليست هناك تعليقات:
إرسال تعليق